TXIOKAKO FACEBOOK TALDEA: SARE SOZIALAK PROBESTEN

 

Txioka Altsasuko ikastolako haur eskola da. Bertako zuzendaria, Jone Areta, Zangozako ikastolan ibili da hainbat urtez eta IKTzalea izan da betidanik.Ikasturte honetan erabaki zuten Haur Eskolako Facebook taldea martxan jartzea eta jadanik 161 lagun dituzte. 

Facebooken bitartez Haur Eskolako albisteak, ekintzak eta abar modu bizkor batez argitaratzeaz gain, sarean aurkitzen dituzten artikulu, gurasoentzako gomendioak, bideoak eta abar erraz partekatzeko aukera ematen du sare sozial honek.

Tresnaren abantaila nagusiak, blogarekin alderatuz, hauek dira nire ustez: bizkortasuna, bat-batekotasuna, interneteko edukiekin modu erraz batez lotzeko aukera eta, batez ere, interaktibitate maila altua.

Poz-pozik daude izaten ari diren arrakastarekin. Nahi izanez gero bere esperientzia kontatzera gonbida dezakegu.

IKASTOLEN UZTA BERRIA

Ikastolen Elkarteak esperientzia luzea du ikasmaterialgintzan. Lan talde zabala eta esperimentatua dabil proiektu honetan. Euskarri anitzeko materialak aurki daitezke gure katalogoan: Jostailuak, jolas eta jokoak, CD-ROMak, DVD-ak, CDak, ipuinak eta liburuak, material osagarriak… Material guzti hauek planteamendu pedagogiko sendo eta gaurkotuetan oinarrituta daude. Horrela frogatzen dute urtea joan urtea etorri lortutako hainbat sarik. Uzta berria zein material guztia Ikastolen Elkarteko katalogoan aurki daiteke: www.ikastola.net

ZOOTROPO IPUINAK ETA DVD-a (2-8)

Gaur ikastolan umeak dituzten guraso asko Txirri, Mirri eta Txiribiton (Xabier Otaegi, Jose Inazio Ansorena eta Txema Vitoria) pailazoekin barre eginez joxkortu ziren, eta beren seme-alabek ere pailazo horiek utzi duten ondareaz gozatzeko aukera izango dute orain. Sailaren izena “Zootropo” da, eta “Aitona-amonak txapeldun, “Astoa eta lehoia”, “Itsua eta sastrea”, “Moro katua” eta “Ttip eta Ttup” dira animazioen izenburuak. Bost minutuko laburrak dira eta animazio laburrei karaoke gisa abestiak kantatzeko atala ere erantsi zaie.

HORMA-IRUDIAK (3+)

Neskaren eta mutilaren gorputz atalekin jolasteko aukera ematen du lehenengo horma-irudi honek. Gorputz atal zehatz bat, organo nahiz hezur zehatz bat esan eta erdialdeko irudi nagusian aurkitzen saiatzen jolas daiteke.
Urtaroak eta hilak izenekoan, urtaro eta hilekin lotutako hizkuntza konpetentziak eta esaera zaharrak ezagutzeko aukera izango dugu.

MATRAKA (8+)

Talde-joko dibertigarria, lagun artean gozatzeko. 500 proba eta galdera ditu, bost kategoriatan banatuta. Originalak, burutsuak eta dibertigarriak. Hona hemen adibide batzuk:
Mimika atalean: Pertsonaia: Edurne Pasaban; Filma: Avatar Definitu atalean: Argitxo definitu (“kriseilua” eta “euskara” hitzak erabili gabe); Lapikoa (“egosi” eta “janaria” erabili gabe). Kantatu atalean: Noizbait (Ken Zazpi); Haurtxo txikia; Single ladies (Beyonce). Erantzun atalean: BA silabaz hasten dena: itsasoko ugaztuna, arrain itxurakoa, eta oso handia; Nork asmatu zuen teleskopioa?

BAGA BIGA, XAGU ETA XIGA (10-11)

Xagu eta Xiga armiarmak dira hemengo protagonistak. Lehiaketak hiru fase ditu. Lehen fasean hogei galdera egiten dira. Horietatik gutxienez hamabost egin behar ditu erabiltzaileak ondo bigarren fasera pasatzeko. Bigarren faseko hamar galderei erantzun ondoren, puntu kopuru jakin bat lortu beharko ditu hirugarrenera pasatzeko. Ondotik, Xagu arituko zaio zirikatzen.CD-ROM formatuan ez ezik Pen Drive formatuan ere banatuko da produktua.

Sustatu.com-etik kopiatuta (Izenburua eta guzti)

MIXERE: antzezpenen musikarako lagungarria

Gabonetan eta ikasturte amaieran heltzean gutako batzuei egokitzen zaigu antzezpen batean edo bestean musika jartzeko ardura. Zintekin hasi ginen garai batean, Cd-etara pasa eta orain ordenagailuz egiten dugu gehienok. Bada zeregin honetan laguntzeko dugu MIXERE programa librea. 
Antzerkian agertuko den musika eta efektuak zerrendaturik ipintzen dituzu, bakoitzak izango duen bolumena eta non hasiko den zehaztu eta listo.
Proba ezazue.

Zenbat gramo bakterio ?

Datuak gordetzeko disko biologikoak.

Hong Kong unibertsitatean, ikerlari talde batek informazioa txertatu egin du bakterioen ADN kateetan.Dagoeneko 90GB, bakterio gramo bat erabiliz (billoi bat bakterio).

Gaur egungo disko gogorrek 4GB informazio gordetzen dute gramo bakoitzeko.

Etorkizunean gramo bat mikroorganismo 200GB informazio gordeko duela iragarri dute.

Datuak kodetu, DNA kate sintetikoetan eraldatuz eta bakterioetan sartzen dituzte.

Hamaika ikusteko jaioak gara!

IKASI NAHI DUENAK BADU NON IKUSI

Aurreko egunean Nafar Gobernuko Integratic/IKT gunea aipatu zen blog honetan. Horretaz gain Eusko Jaurlaritzako Eskola 2.0 ataria aipatu behar da bertan ere baliagarriak suerta daitezkeen tutorial batzuk agertzen direlako: arbel digital interaktiboak, Web 2.0, aplikazio ofimatikoak, gida metodologikoak, sekuentzia didaktikoak.. Guzti hau Prestakuntza 2.0 atalean aurkituko duzue.
Beraz, izenburuan esan bezala, inoiz baino baliabide gehiago daude sarean irakasle eta ikasleen IKT prestakuntza hobetzeko. Nahi izatea da gakoa. :-)

KLASE MAGISTRALAK AHAZ DITZAGUN... ALA EZ?

Jaso Ikastolan izan genuen bileran gaia atera zen: klase magistralek ez dute lekurik XX. mendeko hezkuntzan. Esaldia sinplifikazio bat da baina behin baino gehiagotan entzun eta agian pentsatu dugu hori.
Honen harira eztabaida polita eta mamitsua sortu zen El Pais egunkarian.

Klase magistralen kontra: Clases a la boloñesa, José Lázaro madrilgo UAMko irakaslea. 
Klase magistralen alde: Empanada boloñesa, Joan B. Culla i Clará, bartzelonako UABko irakaslea.

Ordena horretan irakurtzea gomendatzen dizuet. Eta betikoa, tarte bat atera ezazue pedagogiaz gogoeta egiteko! :-)

Lotus Symphony: Musika berria betiko OpenOfficen oinarrituta

OpenOfficen punturik ahulena itxurarena litzateke. Zaharkitu samar geratu da estetikoki eta hau hobetzeko ahaleginak egiten ari badira ere ez dirudi epe motzera bertsio erakargarriago bat izango dugunik. Agian OpenOffice.org proiektuan sortutako dibortzioa dela eta LibreOfficek ekingo dio erronka estetikoari, nork daki.

Itxaroten dugun bitartean Lotus Symphony aukera polita da gure testu prozesatzaileari itxura berri bat eman nahi diogunontzat. "Suite" hau OpenOfficen oinarritzen bada ere, ez da software librea, baina doakoa da. Probatzen ibili naiz eta asko gustatu zait. Berehala kokatuko zarete; are gehiago formatu panoramikoko monitorea baduzue, alboko menuak erabiltzen dituelako. Formatu irekiak onartzen ditu, noski, baita Microsoft-en formatu erabilienak. Proba ezazue eta baloratuko dugu.

Iturria: Genbeta

Integratic/IKT– Sitio Escuela 2.0 en Navarra

ParaPNTE blogaren bitartez Integratic/IKT gunearen berri izan dut. Nafarroako Hezkuntza Departamentuak sortutako gunea da. Tutorialak, bideotutorialak, baliabideak eta abar biltzen ditu. Gonbidatu gisa sar zaitezke atal guztietara foroetara izan ezik.